Shechen Tennyi Dargyeling: October 2011

jemeelama

རྨད་བྱུང་གངས་ཅན་ཆོས་རིག་ཉིན་བྱེད་དབང་། །འཆད་ཉན་རླུང་གི་ཤིང་རྟས་ལེགས་དྲངས་ནས། །ལྔ་རིག་གཙུག་ལག་འདབ་བརྒྱའི་ཚལ་འབྱེད་པའི། །བཤེས་གཉེན་དམ་པ་རྣམས་ལ་གུས་པས་འདུད། །གངས་ཅན་འཕེལ་འགྱུར་ཕྱོགས་པའི་དགོས་གལ་ལ། །བཅུ་ཕྲག་རིག་གནས་འཛིན་སྐྱོང་སྤེལ་གསུམ་ཆེད། །སི་བོད་སློབ་གྲྭ་བཙུགས་པའི་ཕྱག་རྗེས་ལ། །མཁས་གྲུབ་དབུ་འཛིན་རྣམས་ཀྱི་བཀའ་དྲིན་དྲན། །དུས་མཐའ་གངས་ཅན་རིག་གནས་དོན་ཆེན་དུ། །བསམ་བཞིན་བྱོན་པའི་ངེས་པ་དོན་ལྡན་གྱི། །རྒྱལ་སྲས་སྤྱོད་པའི་མཁས་དབང་དམ་པ་མཆོག །བཤེས་གཉེན་ཐུབ་བསྟན་ཉི་མ་བཀའ་དྲིན་དྲན། །སློབ་དཔོན་ཐོན་མིའི་དགོངས་པའི་ཡང་སྙིང་དང་། །སི་ཏུ་པཎ་ཆེན་གསུང་གི་ལེགས་བཤད་ཀྱི། །སྙིང་པོ་གཅིག་ཏུ་འཆད་པའི་དབང་ཕྱུག་ཆེ། །བཤེས་གཉེན་བུ་ཕྲུག་བཀའ་དྲིན་གསལ་བར་དྲན། །རིགས་པའི་དབང་ཕྱུག་རྣམ་གཉིས་གཙོར་གྱུར་པའི། །འཕགས་བོད་མཁས་པའི་ཚད་མའི་བསྟན་བཅོས་དང་། །བསྡུས་བློ་རྟགས་གསུམ་འཆད་ལ་དབང་འབྱོར་པའི། །བཤེས་གཉེན་ཡེ་ཤེས་དར་རྒྱས་བཀའ་དྲིན་དྲན། །དཔལ་ལྡན་དུས་འཁོར་རྩ་བསྡུས་རྒྱུད་གཉིས་ཀྱི། །བྱེད་གྲུབ་རྩིས་ཀྱི་རྣམ་གཞག་ཕྲ་རགས་ཀུན། །ཕྱག་རྩེར་འགོད་མཁས་རྩིས་ཀྱི་མཁན་པོ་མཆོག །བཤེས་གཉེན་དོན་ཚེའི་བཀའ་དྲིན་གསལ་བར་དྲན། །འཇམ་མགོན་མི་ཕམ་གསུང་གི་ལེགས་བཤད་ལས། །བསྟན་བཅོས་མཁས་འཇུག་གཞུང་ལ་ཐུགས་མཉེས་པ། །བསླབ་གསུམ་བརྗོད་བྱ་གཅིག་ཏུ་འཆད་མཛད་པའི། །བཤེས་གཉེན་སྨན་ལྷའི་བཀའ་དྲིན་གསལ་བར་དྲན། །ཡི་གེའི་སྦྱོར་ཚུལ་སྤྱི་དང་བྱེད་བྲག་གང་། །བརྡ་དག་གཞུང་གི་རྒྱན་གྱུར་ངག་སྒྲོན་སོགས། །འཆད་ལ་དབང་འབྱོར་དག་ཡིག་སྨྲ་བའི་དབང་། །བཤེས་གཉེན་པད་མ་རྒྱལ་མཚན་བཀའ་དྲིན་དྲན། །སྙན་ངག་གཞུང་གི་རྩ་འགྲེལ་གང་ཡིན་ཡང་། །འཕགས་བོད་མཁས་པའི་གསུང་གི་ལེགས་བཤད་ཀྱིས། །ཡང་དག་འཆད་པའི་སྙན་ངག་མཁན་པོ་མཆོག །བཤེས་གཉེན་པད་རྡོའི་བཀའ་དྲིན་གསལ་བར་དྲན། །སྒྲ་ཚད་སྙན་ངག་བསྟན་བཅོས་གང་གི་དོན། །སྔོན་བྱོན་མཁས་པའི་ལེགས་བཤད་དང་འབྲེལ་ནས། །ཁ་གསལ་གོ་བདེས་འཆད་ལ་དབང་ཐོབ་པའི། །བཤེས་གཉེན་རྡོར་ལོའི་བཀའ་དྲིན་གསལ་བར་དྲན། །གངས་ཅན་མེས་པོའི་སྣོད་བཅུད་བྱུང་ཚུལ་དང་། །སྒྲུབ་བརྒྱུད་ཤིང་རྟ་བརྒྱད་ཀྱི་ལོ་རྒྱུས་སོགས། །གསལ་ཞིང་རྒྱས་པར་འཆད་ལ་དབང་འབྱོར་བའི། །བཤེས་གཉེན་ས་འགོའི་བཀའ་དྲིན་གསལ་བར་དྲན། །སྙན་ངག་རྩ་བའི་དགོངས་དོན་གསལ་བྱེད་དུ། །བོད་མཁས་ཆེན་པོའི་དཎྜིའི་དགོངས་རྒྱན་གང་། །རྒྱས་བསྡུས་ཚུལ་བཞིན་འཆད་ལ་དབང་འབྱོར་བའི། །བཤེས་གཉེན་སྐལ་བཟང་དར་རྒྱས་བཀའ་དྲིན་དྲན། །དབུ་ཕར་འདུལ་མཛོད་སོགས་ཀྱི་གཞུང་ལུགས་དང་། །ཕྱི་ནང་གྲུབ་མཐའ་རྒྱ་མཚོའི་དགོངས་དོན་སོགས། །ཐུགས་ཐོག་གཅིག་ནས་འཆད་པའི་གཏེར་ཆེན་པོ། །བཤེས་གཉེན་རྩ་ར་ཆོས་གྲགས་བཀའ་དྲིན་དྲན། །ནད་རིགས་བཞི་བརྒྱ་རྩ་བཞི་འཇོམས་ཐབས་ཀྱི། །སྟོན་བྱེད་གསོ་རིག་རྒྱུད་བཞིའི་རྣམ་གཞག་དང་། །ལག་ལེན་མན་ངག་འཆད་ལ་དབང་འབྱོར་བའི། །བཤེས་གཉེན་འགྲོ་འདུལ་རྣམ་རྒྱལ་བཀའ་དྲིན་དྲན། །སྙན་ངག་རྩིས་སོགས་འཆད་ལ་རབ་མཁས་ཤིང་། །རྫོགས་ཆེན་རྣལ་འབྱོར་སྤྱོད་པའི་ཚུལ་འཛིན་པའི། །གསང་སྔགས་རྡོ་རྗེ་བསྟན་པའི་སྔགས་འཆང་བ། །བཤེས་གཉེན་ཨ་འཇམ་བཀའ་དྲིན་གསལ་བར་དྲན། །འགྲོ་བའི་རིམས་ནད་དྲུངས་ནས་སེལ་བྱེད་པར། །བཅོས་ཐབས་མན་ངག་སྟོང་གིས་རྒྱུད་ཕྱུག་ཅིང་། །གངས་ཅན་གསོ་རིག་འཆད་ལ་དབང་འབྱོར་བའི། །བཤེས་གཉེན་འཇམ་རྡོར་བཀའ་དྲིན་གསལ་བར་དྲན། །སྐལ་ལྡན་རྗེས་སུ་འཛིན་པའི་བཟོ་རིག་གི །གཞུང་ལུགས་མན་ངག་དང་བཅས་འཆད་པ་དང་། །ཕྱག་སོར་སྒྱུ་རྩལ་འགོད་ལ་དབང་འབྱོར་བའི། །བཤེས་གཉེན་དཔལ་ལྡན་བཀའ་དྲིན་གསལ་བར་དྲན། །གངས་ཅན་ཡི་གེའི་གཟུགས་ཀྱི་སྒྱུ་རྩལ་རྣམས། །ཡིག་མཁན་གོང་མའི་ཕྱག་རྒྱུན་སྤེལ་བ་ལ། །དུས་མཐའི་སྨྱུག་འཛིན་ཆེན་པོའི་རྣམ་ཐར་ཅན། །བཤེས་གཉེན་ཚེ་རིང་ཉི་མའི་བཀའ་དྲིན་དྲན། །སྒྲ་སྙན་རྩིས་སོགས་རིག་པའི་གནས་བཅུ་དང་། །ཁྱད་པར་སུམ་རྟགས་དག་གསུམ་གྱིས་མཚོན་པའི། །བརྡ་དག་གཞུང་ལུགས་འཆད་ལ་དབང་འབྱོར་བའི། །བཤེས་གཉེན་བསམ་གཏན་བཀའ་དྲིན་གསལ་བར་དྲན། །བརྡ་སྤྲོད་རིག་པའི་གཞུང་དོན་སྤྱི་དང་ནི། །ཁྱད་པར་རྟགས་ཀྱི་འཇུག་པའི་དཀའ་གནད་དག །འཆད་དང་གསེད་བཀྲོལ་མཛད་ལ་དབང་འབྱོར་བའི། །བཤེས་གཉེན་མཁྱེན་རབ་འོད་གསལ་བཀའ་དྲིན་དྲན། །སྐད་གཉིས་སློབ་གསོས་འཆད་དང་བསྒྱུར་བ་དང་། །རྩོམ་དང་བྲིས་ལ་ལེགས་པའི་རྩེར་སོན་པའི། །སྒྲ་སྒྱུར་ལོ་ཙྭ་ཆེན་པོའི་མཚན་འཛིན་པའི། །བཤེས་གཉེན་སྐལ་བཟང་ཆོས་འཕེལ་བཀའ་དྲིན་དྲན། །རྒྱ་བོད་སྐད་གཉིས་སྨྲ་ལ་ཐོགས་མེད་ཅིང་། །ལོ་ཙཱའི་གཞུང་ལུགས་འཆད་དང་བསྒྱུར་བ་དང་། །འགྱུར་ཐབས་སྣ་ཚོགས་དཔྱད་ལ་དབང་འབྱོར་བའི། །བཤེས་གཉེན་གཡང་སྐྱིད་བཀའ་དྲིན་གསལ་བར་དྲན། །བཤེས་གཉེན་རྣམས་ཀྱི་མཚན་ཙམ་དྲན་པ་ཡིས། །རྨོངས་པའི་མུན་པ་སྐད་ཅིག་འཇོམས་མཛད་ནས། །ཚེ་རབས་ཀུན་ཏུ་བདག་སོགས་སློབ་ཚོགས་ཀྱི། །བློ་གྲོས་གསལ་བའི་སྣང་བ་རྒྱས་གྱུར་ཅིག །ཁ་བ་ཅན་དུ་ཆོས་དང་རིག་གནས་ཀྱི། །ཕན་བདེའི་དཔལ་ཡོན་ཇི་སྲིད་གནས་པའི་བར། །གཞན་ཕན་སྤྱོད་པའི་བཤེས་གཉེན་དམ་པ་རྣམས། །བདག་སོགས་སློབ་ཚོགས་སྙིང་དབུས་གཏན་བཞུགས་གསོལ། །སི་ཁྲོན་བོད་སློབ་བཙུགས་ནས་ད་ལྟའི་བར། །སློབ་གྲྭའི་འཛིན་སྐྱོང་ཁུར་ཆེན་ཡོངས་བཞེས་པའི། །དབུ་འཛིན་རྣམས་དང་ལས་བྱེད་ཡོད་ཚད་ཀྱི། །འབད་པ་ལྷུར་ལེན་མཛད་པའི་བཀའ་དྲིན་དྲན། །བཤེས་གཉེན་རྣམས་ཀྱི་བཀའ་དྲིན་རྗེས་དྲན་གྱི། །ཚག་གི་ཕྲེང་བ་སྤེལ་བའི་དགེ་བ་འདིས། །དུས་གསུམ་ཀུན་ཏུ་བདག་རྣམས་རྗེས་བཟུང་ནས། །ལུགས་གཉིས་བླང་དོར་འབྱེད་ལ་མཐུ་ཐོབ་ཅིག །

Shechen Tennyi Dargyeling

sang

Monday, October 17, 2011

Random

sang

Monday, October 17, 2011

Random

Subscribe To